اسلام آباد میں بننے والے پہلے میگا پروجیکٹ کا جائزہ لینے وزیر اعظم خود سائٹ پر پہنچ گئے

اسلام آباد: پاکستان تحریک انصاف کی حکومت کے پہلے میگا پروجیکٹ کی منصوبہ بندی مکمل ہوگئی. جس کا جائزہ لینے کے لیے وزیر اعظم عمران خان خود سائٹ پر پہنچ گئے۔ اور تمام انتظامات کا جائزہ لیا
تفصیلات کے مطابق وفاقی دارالحکومت اسلام آباد میں نیا کمرشل شہر بنانے کی منصوبہ بندی مکمل ہوگئی، وزیر اعظم عمران خان ’نیو بلیو ایریا‘ منصوبے کا جائزہ لینے خود سائٹ پر پہنچ گئے۔ سائٹ پر وزیراعظم بغیر کسی پروٹوکول کے پہنچے. جہاں ان کو بریفنگ دی گئی
بریفنگ میں بتایا گیا کہ منصوبے کے لیے ایف 9 پارک کے سامنے 170 کنال زمین مختص کی گئی ہے۔ جدید تعمیرات اور ہائی رائز بلڈنگ پر مبنی کمرشل سٹی عالمی طرز پر تعمیر ہوگا۔ اوور سیز پاکستانیوں کو سرمایہ کاری کی خصوصی دعوت دی جائے گی۔
بریفنگ کے مطابق لندن، دبئی، مانچسٹر، شکاگو اور گلاسکو سمیت بڑے شہروں میں روڈ شو ہوں گے، وفاقی ترقیاتی ادارہ اپریل کے پہلے ہفتے میں کمرشل نیلامی کرے گا۔
وزیر اعظم کی ہدایت پر نیلامی میں حصہ لینے والوں کو سہولت دینے کا فیصلہ کیا گیا ہے اور مکمل ایڈوانس ٹیکس دینے کی شرط ختم کردی گئی ہے۔ کامیاب بولی دہندگان کو رقم کی ادائیگی کے لیے 30 دن کا وقت ملے گا۔ اوور سیز پاکستانیوں کو رقم کے انتظام کے لیے مناسب وقت دیا جائے گا۔
حکام کے مطابق منصوبے سے ابتدائی طور پر حکومت کو 25 سے 30 ارب ملیں گے، حکومت آمدن کا کچھ حصہ نیا پاکستان ہاؤسنگ پروجیکٹ میں استعمال کرے گی اور رقم بے گھر اور غریب افراد کے لیے سستے گھروں کی تعمیر پر خرچ ہوگی۔
منصوبے سے روزگار اور معاشی سرگرمیوں میں اضافے سمیت تعمیراتی انڈسٹری کو بھی فروغ ملے گا۔

اپنا تبصرہ بھیجیں