کراچی میں سردی کے ٍڈیرے، پارہ 8 ڈگری ریکارڈ

کراچی میں ٹھنڈی ہواؤں نے بسیرا کرلیا جس سے شہر کا درجہ حرارت کم ہونے سے سردی میں مزید اضافہ ہوگیا۔
محکمہ موسمیات کے مطابق شہر کا کم سے کم درجہ حرارت 8.2 ڈگری سینٹی گریڈ ریکارڈ کیا گیا جب کہ کم سے کم درجہ حرارت 8 سے 10 ڈگری سینٹی گریڈ کے درمیان رہنے کا امکان ہے۔
محکمہ موسمیات کا کہنا ہے کہ ہوا میں نمی کا تناسب 41 فیصد ہے اور شمال مشرق کی سمت سے 18 کلو میٹر فی گھنٹہ کی رفتار سے چل رہی ہیں جب کہ آئندہ 24 گھنٹوں کے دوران کراچی کا مطلع صاف اور موسم سرد رہنے کا امکان ہے۔
ملک بھر میں گیس کی شدید قلت نے عوام کی پریشانی میں اضافہ کر دیا ہے۔ لاہور سمیت پنجاب بھر میں گھروں کے چولہے بھی ٹھنڈے پڑ گئے جس کے باعث خواتین پریشان ہوگئیں اور گھروں میں اطمینان سے کھانا بنانا بھی حسرت ہی بن گئی۔
یہی نہیں گیس پریشر کم ہونے سے گیزر بھی بند پڑ گئے اور نہانے کے لیے گرم پانی بھی دستیاب نہیں ہوتا۔
دوسری جانب گیس کے کم پریشر نے کمرشل صارفین کو بھی ٹف ٹائم دے رکھا ہے اور مہنگی ایل پی جی اور لکڑی کا استعمال مجبوری بن گیا ہے۔
کمرشل صارفین کا کہنا ہے کہ گیس آتی نہیں لیکن بلوں نے کمر توڑ کے رکھ دی ہے۔
علاوہ ازیں گیس کی غیر اعلانیہ بندش کے خلاف لاہور کے بعض علاقوں میں لوگوں نے احتجاج بھی کیا ہے۔ اس ضمن میں سوئی ناردرن حکام کا کہنا ہےکہ کہ بس ایک دو ماہ کی بات ہے، موسم بہتر ہوتے ہی گیس پریشر بھی ٹھیک ہو جائے گا۔

اپنا تبصرہ بھیجیں